Blíðviðri er nú þessa dagana og fór hitinn yfir 16 gráður í dag og í gær.  Nú er verið að undirbúa kornskurðinn af mýrartúnunum en það þarf að græja gámana til ásamt ýmsu öðru.  Fyrsti burðurinn þetta haustið átti sér stað úti á túni á sunnudaginn, en við mjaltirnar vantaði eina kúna sem fannst með kvígukálfi upp á túni (undan óreyndu nauti, Laufás 08003).  Stutt er í næsta burð en svo er lítið meira í september nema ein á tal 29.  Október verður svo heldur viðburðarmeiri.  Stefnan er á að gera nokkuð margar snemmbærar á næsta ári, færa þær til sem ekki héldu seinnipartsvetrar.  Það þýðir líkast til að geldstaðan verður í lengra lagi hjá nokkrum sem kemur niður á meðalnyt, en það er aukaatriði, aðalatriðið er að kýrnar beri á skikkanlegum tíma þegar aðrar annir trufla ekki ljósmóðurstörfin í fjósinu.
Eftir er að tína krækiberin og gera saft sem er nauðsynlegt með ábrystunum (broddurinn hjá kúnum fyrst eftir burð).
Stelpurnar halda gönguæfingum áfram og eru orðnar ansi lunknar við að ganga mishæðir í landslaginu án þess að detta.  Að sjálfsögðu labba þær svo í sitt hvora áttina svo það er spurning um að koma sér í form og láta laga hnéið/hnéin svo maður nái þeim.
Náði að slá í kringum húsið svona í síðasta sinn (vonandi) fyrir veturinn, en það var orðið vel sprottið og tók á sláttumenn og sláttuvélina allhressilega.

Í dag var kornskurður hafinn þetta haustið þó enn sé sumar.  Fyrir liggur að skera/þreskja 18 ha fyrir næstu rigningu, hvenær svo sem hún kemur.  Þar sem kornið er svo þurrt að ekki er hægt að nota mjólkursýrugerla til að sýra það verður að keyra með það í þurrkun til Yrkjanna, en það er smá spotti að fara þangað.  Gulari akur hefur ekki sést lengi en það verður að bíða og sjá hvað uppskerumagnið er.  Vonandi að hálmurinn náist líka þurr og fínn.
Nú styttist í að kýrnar fari að bera aftur, þó erum við að gelda upp núna nokkurn hóp.  Einhver tilfærsla verður á burði næsta árið þar sem kýrnar og kvígurnar héldu mjög illa núna seinni part vetrar.  Þar sem við nennum ekki að láta bera í apríl-ágúst færist því burður allhressilega til á mörgum.  Þá eru 3 vel ættaðar kvígur enn fanglausar en það skal koma fangi í þær með einhverju móti.
Gönguhrólfarnir eru enn æstir í að ganga og verða nett brjálaðar þegar á að setja þær í vagninn.

Í dag tóku þær systur rispu í gönguæfingum þar sem þær gengu frá húsinu hjá mömmu og pabba og út í fjós.  Þær harðneituðu að fara í vagninn og fer það að kosta smá slagsmál og læti.  Þessi gönguæfing tókst með ágætum og lítið um að þær væru að detta, rokið fleytti þeim áfram fullharkalega stundum en það var merkilegt hvað þær toldu á fótunum þó.

Rigningin var kærkomin og breytti gulum túnum í græn og vætti þökurnar einnig.  Búið er að slá hér heima og tína rúllurnar.  Þó er enn hörkuspretta og verður að nýta hana sem beit meðan veður leyfa.  Áfram er hlýtt á daginn sem er gott fyrir kornið en viðmiðunin er að meðan hiti er yfir 12 gráðum í ágúst þá er kornið enn að bæta við sig. 
Britta hin þýska er nú farin og var tíminn nýttur í bókhaldstörn.  Í síðustu viku fór Alexandra Ásta að sleppa sér og taka rispur eftir gólfinu, tók hún svo smá æfingar á hverju kvöldi og er nú allt í einu farin að ganga um allt og æðir um úti einnig.  Að sjálfsögðu fara þær svo í sitthvora áttina svo það verður að velja hvert eigi að hlaupa fyrst . 
Sigrún og strákarnir komu svo í heimsókn í kvöld í sveitina og verða nokkra daga.  Kannski verður kíkt á berjamó eða eitthvað þessháttar

Loksins kom að því að það rigndi, en hversu mikið þetta er er ekki gott að segja og hvort það dugi til einhvers að gagni. 
Nú undanfarið hefur allt verið á hvolfi hér úti, búið að hafa jarðvegsskipti undir hellur hjá mömmu og pabba.  Hér fyrir utan er að síga á seinni helminginn og fyrir framan mjólkurhúsið.  En lagnavinna ýmis hefur tafið verkið, vatnslögin var aðeins strokin ásamt síma og svo þurfti að endurnýja skólp frá fjósi og breyta lögnum hér fyrir framan ásamt því að færa ljósastaur og ýmislegt fleira.  Það er bara spurning um hvenær allt verður fínt hér fyrir framan og almennilega fært fyrir vagninn??  

Kornakurinn hér fyrir neðan er löngu orðinn gulur, bæði er það þurrkunum að kenna og svo er kominn þroski í kornið, gul slikja er að koma á akrana upp í flóa einnig svo það fer að bresta á kornskurður með látum.  Þá er eftir að slá nýræktina og snyrta smá há.

Í gær fórum við í berjamó og fundum flott aðalbláber sem við erum svo búin að gæða okkur á með ís og öllu tilheyrandi.  Nú erum við í kappi við maðkinn sem eyðileggur allt lyng upp úr miðjum ágúst hér um slóðir.

Bjarndís Erla er farin að stika um gólf og dansar í hringi, meðan er Alexandra Ásta á hnjánum en vantar aðeins að sleppa takinu þegar við leiðum hana, einhver kettlingur í henni með það.  Þær fundu ekkert fyrir 18 mánaða sprautunni um daginn, en skoðunin kom annars vel út.

Nú er bókhaldstörn þar sem þýska stelpan sem rak á fjörur okkar og hún Erla Gunnlaugs eru hörku barnapíur svo það verður að nota tímann meðan þær eru.  Maður gerir ekki baun með gönguhrólfana annað en að snúast með þær.

Bjarndís Erla gekk um gólf í kvöld eins og herforingi, æddi framm og til baka og gríðarlega ánægð með sig.  Alexandra Ásta vildi endilega gera eins en er aðeins á eftir svo við þurftum að halda í hendurnar á henni.  Þetta kemur einn daginn.  Í fyrradag voru þær í 18 mánaða skoðun og sprautu.  Þær eru um 11 kg og 78 cm og 90 cm (Bjarndís er eilítið styttri og þyngri).  En sem sagt í leiðréttum aldir má bóka að Bjarndís Erla hafi farið að ganga 15 mánaða.  Það er samt þekkt að miklir fyrirburar séu nokkuð seinni í hreyfiþroska, þó má kannski skella skuldinni á það að þær hafa gengið á hnjánum síðan í vetur og því ekki haft eins mikla þörf fyrir að standa á fótunum og ganga, en þetta kemur allt saman.  Núna er jaxl að koma í neðri góm hjá Alexöndru (ásamt fleiri tönnum) og er hún frekar pirruð yfir þessu og sefur stutt á nóttunni.
Þessa dagana er bongóblíða og sól og hlýjindi.  Hestarnir eru farnir að hósta svo þetta verður lítið útreiðarsumar
Fórum um daginn í heljarinnar ferðalag, alla leið á Austfirðina, endastöð var Fáskrúðsfjörður í allveg hellirigningu.  Tókum fyrsta daginn á Akureyri og svo á Fáskrúðsfjörð.  Þar var einskonar ættarmót þar sem minnst var 100 ára afmæli Guðbjargar ömmu hans Þrastar sem er frá Dölum (fyrsti bær þegar komið er út úr göngunum).  Vorum þar í 3 nætur og þá fjórðu á Egilsstöðum.  Næst tókum við rúnt á Húsavík og hittum Steinunni hina ömmu Þrastar, og Ekru í Öxarfirði.  Þá var veðjað á að komast alla leið heim á einum degi með góðu stoppi á Akureyri og svo aftur á Kagaðarhóli.  Tókum kvöldverðarstopp í Víðihlíð og svo beint strik heim, sá dagur var 12 tíma ferðalag og margir orðnir þreyttir að leiðarlokum.  Stelpurnar sváfu nokkuð í bílnum en þegar þær vöknuðu varða að stoppa eftir ca hálftíma til klukkutíma.
Nánari fréttir síðar af gönguhrólfum

eru að rúllast og pakkast núna í kvöld.  Á morgun er svo Miðhraun og þá er fyrri slætti lokið.  Rúlluvélin hefur gengið nokkuð áfallalaust, smá hnökrar með pökkun þ.e. að láta pökkunarborðið stoppa á réttum stað, en það tefur að koma því á réttan stað svo hægt sé að halda áfram.  Von er á sérfræðingi að sunnan í það verk svo allir verði mjög kátir.  Þurrkur er áfram næstu daga svo það ætti að vera nóg verkefni fyrir rúlluvélina að vinna, Hjarðarfell og Hrísdalur eru ekki búnir og svo kemur meira seinna í sumar, vonandi verður þá aftur þurrkur.
Nefrennslið í hestunum er eitthvað að minnka nema þurrkurinn sé svo mikill að það sjáist ekki.  Stendur til að prófa að hreyfa þá aðeins og einnig þá sem hafa verið á útigangi.  Reyndar eru andsk.... rollur að streyma að bæði úr vestri og suðri sem hafa ekkert hingað að gera.  Okkar rollur fara lengst fram í nes um leið og þær fá fararleyfi úr túninu og koma ekki nálægt fyrr en seinnipart ágústmánaðar.  Þær lifa mjög sparsamt þarna frammi því þær hljóta að drekka sjó því ekkert ferskt vatn er þarna frammi.
Bjarndís er í hörku æfingum að taka nokkur skref óstudd og finnst hún ægilega dugleg og monntin eftir því.  Alexandra er varkárari og tekur þetta hægar en æfir sig samt.
Kýrnar fóru út á sunnudaginn og kvígurnar daginn eftir með tilheyrandi látum þó lætin séu hóflegri en áður þegar þær voru bundnar á bás allan veturinn.

.... í dag kom nýja rúlluvélasamstæðan í hlaðið.  Þetta er án efa flottasta rúlluvélasamstæðan á landinu í dag.  Claas Rollant 455 sem er ný týpa beint úr verksmiðjunni.  Nú halda allir að við séum galin ný samstæða.  En við erum 4 aðilar sem eigum hana (og áttum þá gömlu) og það er löng saga að baki sem endar vonandi vel og allir verða ánægðir.  Allavega þá er hún rosalega flott á að líta og gekk nokkuð áfallalaust að rúlla nokkrum rúllum með og án hnífa, söxunin með hnífunum er mikil og jafnvel tilbúin beint í fóðurkerfi.  Nú verður bara spennandi að sjá hvernig hún reynist í sumar.
Nú í vikunni gleymdu þær systur sér aðeins og gengu nokkur skref óstuddar og eru duglegar að æfa sig í að standa án stuðnings, svo það er spurning hvenær þær æða af stað....  Einhver tanntaka er í gangi með pirringi hjá Alexöndru og rokum á nóttunni.  Frést hefur að Alexandra hafi skroppið á hestbak á Spora.
Hestarnir eru með eitthvað nefrennsli og heyrði ég Spora hósta í dag út í gerði.  Svo þeir eru mest í hvíld þessa dagana.

Það náði saman, jarðvinnslan og slátturinn.  Þegar pabbi var að valta síðasta flagið byrjaði ég að slá fyrstu blettina, Þröstur smurði vélarnar af kappi og mamma sá um stelpurnar.  Sló einhverja 7 ha plús í dag sem verða rúllaðir í kvöld/nótt fyrir rigningu á morgun.  Vallarfoxgrasið á nýræktunum lagðist undan rigningunni svo það varð að drífa í að slá það til að bjarga því sem fóðri fyrir mjólkurkýr í vetur.  Sló buxurnar, litla bleðilinn á leiðinni suður á Stekkjarhöfða, litla stykkið í Leirlækjarholtunum, Bungurnar og svo hér fyrir vestan bæinn, það tvennt síðastnefnda er svo ætlað til beitar fyrir kýr og kvígur þegar þær fara út. 

Á morgun er svo afmælisveisla í Mosó

Fórum í kvöld í annað sinn í hólmann að tína dún.  Nokkuð margar voru búnar að unga út og farnar og nýjar komnar í staðinn.  Nokkrir ungar voru enn í hreiðrum.  Þetta er nokkuð þétt byggð, hreiður við hreiður á kafla svo maður ferðast bara um á hnjánum.  Þetta fer að verða með betri dúnsumrum að magni til og veðurfarið gott til að ná dúninum líka.  Fórum á dráttarvél líkt og í fyrra skiptið þar sem enn er nefrennsli hjá hestunum og þetta er nú smá spotti að fara þarna fram.  Er búin að henda fötunum í þvottavélina og skola lyktina af mér svo nú er ég klár á að leggja mig undir dúnsænginni minni

Í gær og í dag hefur verið öskuþoka, reyndar komið seinnipartinn svo við sleppum vel.  Núna í kvöld er nokkuð dökkt útlit hér og sést ekki til fjalla.  Hitinn í dag fór yfir 20 gráður og má því segja að hér sé bongoblíða.  Styttist óðum í slátt og ef það myndi nú rigna yrði líkast til rokspretta.
Síðasta kindin bar í dag, en kindurnar sem báru um daginn eru komnar niðurfyrir.  Niðurstöður sauðburðar eru í slappar lagi, dáldið einlembt og 2 dauð lömb, slatti gelt svo það verða óvenju fá lömb í haust, spurning um að kanna þennan hrút sem notast var við.

Alexandra og Bjarndís eru nokkuð sprækar, reyndar var Alexandra með hita í gær og kíkti læknir á hana, en hún hefur ekki verið sjálfri sér lík síðan helgina fyrir hvítasunnu.  Læknirinn sá smá bólgu í hálsinum en greindi ekki neina staf.kokka A sem eru ljótu kallarnir.  Bjarndis bullar heil ósköp og apar eftir mörg orð.  Beibí túlkast sem Bjarndís t.d. og er bolti líka í uppáhaldi.  Alexandra fer sér hægar í bullinu enda mun alvörugefnari.

Hestarnir eru enn með nefrennsli og hefur heyrst í Hátið hósta eftir að koma gelta folanum upp í girðingu.

Um helgina er svo hittingur 20 ára stúdents/útskriftarhóps frá FVA á Akranesi og verður það vonandi hin besta skemmtun.

og þá er hestapestin komin hingað.  Þá er spurning hversu langan tíma þetta taki að ganga yfir, hér eru hestar ekki í neinni svaka stífri þjálfun en eru brúkhæfir þeir sem hafa verið á húsi í vetur, svo vonandi þeir komist yfir þetta fljótt.  Veðrið er gott svo það ætti ekki að ganga nærri þeim.  Útigangurinn er líka með nefrennsli en hef ekki skoðað tryppin upp í girðingu en reikna með að þau séu líka með nefrennsli því þau voru öll saman um helgina, klipptir hófar, gefið ormalyf og svo voru tryppin tekin frá og sett upp í flóa.
Grasið roksprettur í þessum hlýjindum og sólfari, svo það styttist í þurrkinn og allar líkur á að nýja rúlluvélin missi af fyrsta slættinum þetta árið. Háliðagrasið er að skríða/skriðið. 
Stelpurnar eru að æfa sig í að standa og labba svo þetta er allt að gerast.  Tennurnar koma í bunkum, jaxlar og læti.  Nú fer að verða erfitt að sofna þegar sólin skín svona á kvöldin líka. 
Þá er bara að bíða eftir seinni sauðburði.

Þá eru kindurnar farnar að bera. Byrjuðu á sunnudaginn og í dag fóru 4 út með lömbum og ein geld ásamt "smálömbunum" síðan í haust.  Ein var einlembd en undir hana var vaninn einn þrílembingur, tvær eru þrílembdar og hinar eru tvílembdar nema gemlingurinn átti eitt en það lamb dó líkast til úr slefsýki.  Í kvöld fór að rigna svo við settum kindurnar inn aftur.  Alexandra og Bjarndís kíktu í fjárhúsin og fengu lamb í fangið, Alexandra faðmaði lambið en Bjarndís svona klappaði því.
Svartbakurinn er búinn að verpa og höfum við farið að tína 4 sinnum, aðeins of langt leið á milli tveggja síðustu skipta svo það var full mikið ungað það sem kom síðast.
Tennurnar eru að ryðjast í Alexöndru og Bjarndísi, jaxlar í efri og neðri góm með tilheyrandi verkjum og pirringi.  Bjarndís fór að æfa sig í gær að sleppa sér og standa ein og óstudd með montsvip. Æfingar munu svo halda áfram væntanlega næstu daga.

Sá kríuna fljúga hér í læknum í dag, í fyrra kom hún 9. maí svo hún er aðeins fyrr núna.  "Grænlandsgæsirnar" eru komnar líka, rauðbrystingarnir, jaðrakinn, kjóinn og fleiri og fleiri, hef ekki séð spóann enda er hann kannski ekki endilega að fljúga hér fyrir utan gluggann.
Núna í vikunni heyrðum við drunur eins og skotið væri af byssu í einhverri fjarlægð, voru þessar drunur endurteknar mörgu sinnum yfir daginn og fleiri en einn dag.  Mjög stillt var í veðri og er eina skýringin að hér sé um að ræða drunur úr Eyjafjallajökli.  Þá sást strókurinn fyrir nokkru síðan við ljósaskiptin eitt kvöldið (áður en það fór að draga úr honum um daginn).  Þetta er magnað fyrirbæri en óhuggulegt engu að síður.
Nú er seinni kornsáningu að verða lokið og tekur þá við áburðardreifing á tún en þau spretta óðum í þessari gróðratíð enda fengu þau skít á ákjósanlegum tíma. 
Stelpurnar ganga enn um á hnjánum en standa upp við allt sem hægt er og labba með borðum og sófum og stólum.  Segja nokkur orð, takk, datt, kex, og ýmis önnur sem við höldum að séu.  Þá skilja þær orðið ótal margt, sækja bolta, dúkkur ofl.
Sauðburður er svo áætlaður eftir viku eða svo, merkin eru komin í hús svo þá er öllu óhætt.

Það er að bresta á með hlýjindum og kjóinn sást í dag.  Klipptum nokkrar greinar af víðinum í gær og sólberjarunnannum og stungum í vatn, kannski potum við því niður í mold seinna.  Skatturinn er frá þetta árið, þökk sé Mæju í N-Hundadal sem er kraftaverkakona.  Lýsa er að slá öll met núna en hver dagurinn á eftir öðrum er hún að mjólka um og yfir 50 kg, fróðlegt að sjá hvað verður úr nautinu hennar sem fer á nautastöðina, en það eru nokkur ár í að afraksturinn sjáist.
Hér er búið að plægja allt fyrir kornið, verið að sanda mýrarstykkin, keyrt heim sandi í gríð og erg.  Vonandi að flagvinnan gangi þokkalega fyrir sig það sem eftir er.